1325 - Número da Resolución aprobada polo Consello de Seguridade das Nacións Unidas, que incide na importancia da participación das mulleres na construción da paz.

En 1325, tres avoas viven nun espazo habitado por roupa e memorias: Roupas colgadas, memorias gardadas, roupas en montóns, un monte de memorias, roupas coloreadas, tráxicas memorias.

Son estas avoas as que nos guían polo universo da muller e a súa relación coa Paz, a través de varios cadros cunha narrativa propia, suxerida polo universo feminino de actividades domésticas, nanas e xogos de nenos, centrándose no activismo, individual ou colectivo, das mulleres.

O ton narrativo de 1325 está intrinsecamente asociado á tenrura e ao humor, procurando intensificar o espírito de positivismo que dá forza a estas mulleres que, por todo o mundo, van tecendo un vestido branco do tamaño da Terra.

Da Guerra ocuparanse os homes. Homero, La Ilíada.

Da Paz ocuparanse as mulleres. Anónimo do século XXI.