AS ORIXES

A Mostra Internacional de Teatro Cómico Festivo de Cangas (MITFC) nace no ano 1984 da man dun equipo de persoas que conxugaron as súas inquedanzas socioculturais co seu gusto polas artes en xeral, e polo teatro en particular, para lanzarse á aventura de crear unha Mostra, de carácter cómico e festivo, dende a que ofrecerlle á vila de Cangas e á península do Morrazo os espectáculos teatrais máis actuais e de calidade procedentes de todos os lugares do mundo.

Aquela primeira Mostra abriuse con Cambaleo Teatro, Teloncillo, Teatro Arca, ou Caritel e en pouco tempo converteuse nun referente indiscutible para todos os amantes do teatro de Galicia, doutras Comunidades Autonomas, de Portugal e do resto de Europa.

Cremos que este éxito responde á súa filosofía inicial: Crear un evento teatral singular, de envergadura, anovador e cunha programación de calidade.

A singularidade de crear unha Mostra cómica e festiva foi a característica elixida deliberadamente por aquelas persoas que, hai case trinta anos, a crearon. Elas confiaban na idiosincrasia desta vila mariñeira e das súas xentes, que viven tan de cara á rúa como de cara ao mar e que participan activa e intensamente en festas parateatrais como o Entroido, as romarías populares ou, directamente, esta Mostra Internacional de Teatro Cómico e Festivo que é patrimonio de todas e todos eles.

É certo que dende aquel 1984 aconteceron moitas idas e voltas, moitos atrancos, económicos e de espazos pero tamén son certos os moitos éxitos artísticos e de público que foron convertendo esta Mostra nun dos eventos teatrais máis relevantes de todos os que se celebran en Galicia.

Chegados a estes tempos de obscenas políticas económicas e ideolóxicas, do abandono da Cultura, Educación, Sanidade, etc., a Mostra pretende seguir sendo un refuxio artístico, cultural e social para quen o necesita, levando como insignia aquela marabillosa ferramenta coa que nos dotamos naquel 1984: O HUMOR E O TEATRO.